یورپ میں شدید گرمی کی لہر کے دوران 1300 سے زائد اضافی اموات ریکارڈ: عالمی ادارۂ صحت

یورپ بھر میں شدید اور غیر معمولی گرمی کی لہر کے باعث 21 جون سے اب تک 1300 سے زائد اضافی اموات ریکارڈ کی جا چکی ہیں۔ اس ہفتے یورپ کے مختلف حصوں میں درجہ حرارت 40 ڈگری سینٹی گریڈ سے تجاوز کر گیا ہے، جس کے باعث اسپتالوں اور ریسکیو اداروں پر دباؤ انتہائی بڑھ گیا ہے اور ایمرجنسی کالز میں نمایاں اضافہ ہوا ہے۔

عالمی ادارۂ صحت (WHO) کے ڈائریکٹر جنرل ٹیڈروس ادھانوم گیبریئسس نے اتوار کو سوشل میڈیا پر جاری اپنے ایک بیان میں تشویش کا اظہار کرتے ہوئے کہا کہ ’یورپ میں گھروں، دفاتر اور اسکولوں کو اس طرح کے شدید درجہ حرارت کے لیے تعمیر نہیں کیا گیا تھا‘۔

دوسری جانب پبلک ہیلتھ فرانس کے مطابق، صرف فرانس میں بدھ سے اب تک عام متوقع تعداد کے مقابلے میں تقریباً ایک ہزار زائد اموات ریکارڈ کی گئی ہیں، اور 24 جون سے اموات کی شرح میں غیر معمولی اضافہ دیکھا گیا ہے۔ شدید گرمی کی وجہ سے جرمنی میں گرمی کا 6 سالہ ریکارڈ ٹوٹ گیا ہے۔ جرمنی کے مشرقی شہر لیپزگ میں شدید تپش کے باعث سڑکوں کا اسفالٹ پگھل گیا ہے جبکہ ٹرام کی پٹریاں اور ان کے جوائنٹس بھی کئی مقامات پر متاثر ہوئے ہیں۔ پٹریوں کو پہنچنے والے نقصان کے باعث ٹرینوں کی آمد و رفت غیر محفوظ قرار دے دی گئی ہے، جس کی وجہ سے ٹرام سروس شدید متاثر ہوئی ہے اور پیر کی صبح تک بند رہے گی۔