مصری وزیر خارجہ کا اسحاق ڈار سے ٹیلیفونک رابطہ، یوم آزادی پر مبارکباد

مصر کے وزیرِ خارجہ بدر عبدالعاطی نے نائب وزیراعظم و وزیرِ خارجہ سناتور اسحاق ڈار سے ٹیلیفون پر رابطہ کیا اور پاکستان کے 79ویں یومِ آزادی کے پرمسرت موقع پر دلی مبارکباد اور نیک تمناؤں کا پیغام پہنچایا۔ ترجمان دفترِ خارجہ کے مطابق، اس رابطے کے دوران دونوں رہنماؤں نے پاکستان اور مصر کے درمیان دہائیوں پر محیط دیرینہ، قریبی اور برادرانہ تعلقات کی تجدید کی اور دونوں ممالک کے دوطرفہ روابط کو مزید استحکام دینے کی عزم کا اعادہ کیا۔

گفتگو کے دوران دونوں وزرائے خارجہ نے باہمی دلچسپی کے تمام اہم شعبوں میں تعاون کو فروغ دینے، بشمول تجارت اور سفارتی روابط کی بہتری پر تبادلہ خیال کیا۔ اس کے علاوہ دونوں رہنماؤں نے اہم علاقائی اور عالمی امور پر بھی تفصیلی بات چیت کی اور مستقبل میں بین الاقوامی فورمز پر ایک دوسرے کے ساتھ قریبی اور مسلسل رابطہ برقرار رکھنے پر مکمل اتفاق کیا