میر رضا کیس: جوڈیشل کمیشن کی وزیر داخلہ سندھ کو نوٹس جاری کرنے کی ہدایت

کراچی: میر رضا کیس کی سماعت کرنے والے جوڈیشل کمیشن نے تلخ جملوں کے تبادلے اور قانونی بحث کے بعد صوبائی وزیرِ داخلہ سندھ ضیا الحسن لنجار کو باضابطہ نوٹس جاری کرنے کی ہدایت کر دی ہے۔

سماعت کے دوران مقتول میر رضا کے والد اور بہن کے علاوہ پولیس سرجن ڈاکٹر سمعیہ بھی کمیشن کے سامنے پیش ہوئیں۔ مدعیان کے وکیل جبران ناصر نے موقف اختیار کیا کہ میڈیکل نمونے کیمیائی تجزیے کے لیے تاخیر سے لیبارٹری بھیجے گئے۔ کمیشن کے استفسار پر ڈاکٹر سمعیہ نے بتایا کہ ہائی پروفائل کیسز میں تاخیر نہیں کی جاتی اور دیر سے نمونے بھیجنے کی صورت میں بعض کیمیکلز کے اثرات ختم ہو سکتے ہیں۔

دورانِ سماعت ایڈووکیٹ جنرل سندھ نے وکیل صفائی کے سوالات پر شدید اعتراض اٹھایا، جس پر کمیشن نے برہمی کا اظہار کرتے ہوئے استفسار کیا کہ “اگر متاثرہ فیملی سوال پوچھ رہی ہے تو سندھ حکومت کو کیا اعتراض ہے؟ کیا آپ کچھ چھپا رہے ہیں؟” ایڈووکیٹ جنرل کی مسلسل مداخلت پر کمیشن نے برہم ہو کر کارروائی معطل کر دی اور وزیرِ داخلہ سندھ ضیا الحسن لنجار کو ذاتی حیثیت میں طلب کرنے کے لیے نوٹس جاری کرنے کی ہدایت کر دی۔