ای سی سی اجلاس میں گیس فراہمی، پاور سیکٹر اصلاحات اور مختلف منصوبوں کیلئے اربوں روپے کی منظوری

وزیر خزانہ محمد اورنگزیب کی زیر صدارت اقتصادی رابطہ کمیٹی (ای سی سی) کے اجلاس کا اعلامیہ جاری کر دیا گیا جس میں مختلف شعبوں کے لیے فنڈز اور اصلاحاتی اقدامات کی منظوری دی گئی۔

اعلامیے کے مطابق پٹرولیم ڈویژن کے لیے 13.1 ملین روپے کی ضمنی گرانٹ منظور کی گئی جبکہ گیس پیدا کرنے والے علاقوں کے پانچ کلومیٹر کے دائرے میں دیہات کو گیس فراہمی کی سمری بھی منظور کر لی گئی۔ اس منصوبے کے لیے تقریباً 3 ارب روپے کی منظوری دی گئی ہے اور اس پر عملدرآمد سوئی نادرن اور سوئی سدرن کے ذریعے کیا جائے گا۔

ای سی سی نے بی ای سی ایس کے اساتذہ کے بقایاجات کی ادائیگی کے لیے 20 کروڑ روپے کی منظوری بھی دی۔ اعلامیے کے مطابق عدالتوں کی ہدایات کے مطابق کم از کم اجرت کے فرق کی ادائیگی کی جائے گی۔

اجلاس میں ہائر ایجوکیشن کمیشن کے لیے عالمی بینک کے منصوبے کے تحت 4 ملین ڈالر اضافی فنڈز کی ری لینڈنگ شرائط سے استثنا کی منظوری بھی دی گئی۔ اس کے علاوہ این ڈی ایم اے کو مون سون آپریشنز اور بیرون ملک انسانی امداد کے لیے 3 ارب 63 کروڑ روپے فراہم کرنے کی منظوری دی گئی۔

پاور ڈویژن کے ایس ڈی جیز اچیومنٹ پروگرام کے لیے ایک ارب 30 کروڑ روپے کی گرانٹ منظور کی گئی جبکہ بجلی کے شعبے میں پیداواری لاگت اور گردشی قرض کم کرنے کے لیے جامع اصلاحاتی پیکج کی بھی منظوری دی گئی۔

اجلاس میں وزارت اطلاعات کی عوامی آگاہی مہمات کے بقایاجات کی ادائیگی کے لیے ایک ارب 47 کروڑ روپے کی منظوری دی گئی جبکہ باقی رقم کے لیے وزارت اطلاعات کو آئندہ سہ ماہی میں نئی سمری پیش کرنے کی ہدایت کی گئی۔