ای سی سی نے پٹرولیم مصنوعات پر ڈیلرز مارجن بڑھانے کی منظوری دیدی

وفاقی وزیرِ خزانہ سینیٹر محمد اورنگزیب کی زیرِ صدارت اقتصادی رابطہ کمیٹی (ای سی سی) کا اہم اجلاس منعقد ہوا، جس میں پیٹرولیم مصنوعات سے متعلق اہم فیصلوں کی منظوری دی گئی۔ کمیٹی نے پیٹرول اور ڈیزل پر ڈیلرز مارجن میں 1 روپے 34 پیسے فی لیٹر اضافے کی منظوری دے دی ہے۔ اس منظوری کے بعد پیٹرول اور ڈیزل پر ڈیلرز کا مارجن 8 روپے 64 پیسے سے بڑھ کر 9 روپے 98 پیسے فی لیٹر ہو گیا ہے۔

آل پاکستان پیٹرول پمپس اونرز ایسوسی ایشن کے وائس چیئرمین نعمان بٹ نے ای سی سی کے اس فیصلے کا بھرپور خیرمقدم کیا ہے۔ انہوں نے ڈیلرز کے دیرینہ مطالبات کی منظوری اور مارجن میں معقول اضافے پر وزیراعظم اور وزیرِ پیٹرولیم کا شکریہ ادا کرتے ہوئے امید ظاہر کی کہ اس اقدام سے پیٹرولیم انڈسٹری کی مالی مشکلات میں کمی واقع ہوگی۔