دبئی ایئرپورٹ کے قریب ڈرون حملہ، ایندھن کے ٹینک میں آگ لگ گئی

دبئی ایئرپورٹ کے قریب ڈرون حملے کے نتیجے میں ایندھن کے ایک ٹینک میں آگ لگ گئی جسے بجھانے کے لیے امدادی کارروائیاں جاری ہیں۔
دبئی میڈیا آفس کے مطابق واقعے کے بعد شہریوں کی حفاظت کو یقینی بنانے کے لیے تمام ضروری اقدامات کیے جا رہے ہیں۔
دبئی حکام کا کہنا ہے کہ ایئرپورٹ کے قریب ایک ڈرون نے ایندھن کے ٹینک کو نشانہ بنایا جس کے باعث آگ بھڑک اٹھی، تاہم حملے میں کوئی شخص زخمی نہیں ہوا۔
حکام کے مطابق امدادی ٹیمیں موقع پر موجود ہیں اور آگ پر قابو پانے کی کوششیں جاری ہیں۔
واضح رہے کہ اس سے قبل ایران کی جانب سے دبئی اور دوحہ کے مخصوص علاقوں میں ممکنہ حملوں کے حوالے سے وارننگ جاری کی گئی تھی۔
ایرانی میڈیا آپریشنز سینٹر نے خبردار کیا تھا کہ آئندہ چند گھنٹوں کے دوران ان علاقوں کے رہائشی ممکنہ حملوں کے پیش نظر احتیاطی تدابیر اختیار کریں اور علاقے خالی کر دیں۔