آئی اے ای اے کے انسپکٹرز ایران کی جوہری تنصیبات کا دورہ کریں گے، ٹرمپ

امریکی صدر ڈونلڈ ٹرمپ نے ایران کے جوہری پروگرام پر سخت موقف اپناتے ہوئے کہا ہے کہ بین الاقوامی جوہری توانائی ایجنسی (IAEA) کے انسپکٹرز مناسب وقت پر ایران کی جوہری تنصیبات کا دورہ کریں گے۔ پنسلوانیا میں صحافیوں سے گفتگو کرتے ہوئے صدر ٹرمپ نے واضح کیا کہ جوہری پروگرام سے متعلق ایران کا مؤقف بالکل غلط ہے اور وہ خود بھی اس حقیقت سے اچھی طرح واقف ہیں۔ انہوں نے کڑے الفاظ میں انتباہ جاری کرتے ہوئے کہا کہ ایران کے جوہری پروگرام کا 100 فیصد جائزہ لیا جائے گا اور اگر ایران کو اپنے لیے مصیبت چاہیے تو وہ جوہری ہتھیار حاصل کر کے دیکھ لے۔

پریس ٹاک کے دوران عالمی معیشت اور توانائی کے شعبے پر بات کرتے ہوئے امریکی صدر نے پٹرولیم مصنوعات کی گرتی ہوئی قیمتوں پر اطمینان کا اظہار کیا۔ صدر ٹرمپ کا کہنا تھا کہ عالمی مارکیٹ میں پیٹرولیم مصنوعات کی قیمتیں تیزی سے گر رہی ہیں اور اب خام تیل کی قیمت کم ہو کر 70 ڈالر فی بیرل پر آ گئی ہے، جس سے صارفین کو واضح ریلیف ملے گا۔