جسمانی اور ذہنی صحت کے ہر ٹیسٹ میں مکمل نمبر حاصل کیے: ٹرمپ

امریکی صدر ڈونلڈ ٹرمپ نے دعویٰ کیا ہے کہ انہوں نے والٹر ریڈ نیشنل ملٹری میڈیکل سینٹر میں اپنا باقاعدہ طبی معائنہ مکمل کر لیا ہے اور اپنی درخواست پر ایک بار پھر ادراکی ٹیسٹ (Cognitive Test) بھی دیا ہے، جس میں وہ سو فیصد کامیاب رہے ہیں۔ اپنی سوشل میڈیا پوسٹ میں ٹرمپ نے لکھا کہ وہ ہر چھ ماہ بعد اپنا طبی معائنہ کرواتے ہیں اور وہ تاریخ کے واحد امریکی صدر ہیں جنہوں نے یہ ٹیسٹ تین مرتبہ دیا اور ہر بار تمام سوالات کے درست جوابات دیے۔ بعد ازاں، وائٹ ہاؤس نے وضاحت کی کہ صدر ٹرمپ دراصل مئی 2026 میں ہونے والی اپنی طبی جانچ کا حوالہ دے رہے تھے، جس کے سرکاری بیان میں انہیں بہترین صحت کا حامل قرار دیا گیا تھا۔

صدر ٹرمپ نے اپنی پوسٹ میں معروف امریکی اخبار ‘نیویارک ٹائمز’ کی نامور صحافی میگی ہیبرمین اور جوناتھن سوان کو کڑی تنقید کا نشانہ بنایا۔ دونوں صحافیوں کی حال ہی میں شائع ہونے والی نئی کتاب میں وائٹ ہاؤس کے بعض سابق اہلکاروں کے حوالے سے ٹرمپ کی عمر، جسمانی توانائی اور صحت کے بارے میں خدشات کا اظہار کیا گیا ہے۔ 80 سالہ ڈونلڈ ٹرمپ امریکی تاریخ میں صدارت کا منصب سنبھالنے والے معمر ترین صدر ہیں، تاہم وہ مسلسل یہ اصرار کرتے آئے ہیں کہ ان کی ذہنی اور جسمانی حالت صدارتی ذمہ داریاں نبھانے کے لیے بالکل موزوں ہے۔

میگی ہیبرمین پر برہم ہوتے ہوئے صدر ٹرمپ نے کہا کہ وہ گزشتہ 10 سال سے ان کے خلاف جھوٹی رپورٹنگ کر رہی ہیں اور ان کی کتاب محض ایک مذاق ہے جس کا 90 فیصد حصہ جعلی خبروں پر مبنی ہے۔ انہوں نے نیویارک ٹائمز کو انتباہ جاری کرتے ہوئے کہا، “جب نیویارک ٹائمز کے خلاف ہمارا اربوں ڈالر کا مقدمہ عدالت پہنچے گا تو انہیں اس کی قیمت چکانا پڑے گی اور وہ وقت زیادہ دور نہیں۔” ٹرمپ نے مزید کہا کہ صحافی کا مقصد صرف انہیں الیکشن ہروانا تھا، مگر وہ ناکام رہیں کیونکہ وہ آج بھی اوول آفس میں بیٹھے ہیں۔ انہوں نے عوام سے اپیل کرتے ہوئے اپنے بیان کا اختتام ان الفاظ پر کیا: “میگی کی کتاب مت خریدیں، یہ سراسر کچرا ہے۔”