گوگل پر 1 ارب ڈالر جرمانہ کیوں کیا؟ ٹرمپ یورپی یونین پر برہم؛ بھاری ٹیرف کی دھمکی

امریکی صدر ڈونلڈ ٹرمپ نے یورپی یونین کی جانب سے معروف امریکی ٹیکنالوجی کمپنی گوگل پر تقریباً ایک ارب ڈالر (890 ملین یورو) کا بھاری جرمانہ عائد کیے جانے پر شدید ردِعمل کا اظہار کیا ہے۔

صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر جاری کردہ بیان میں سخت موقف اپنائے ہوئے کہا کہ “امریکا یورپ کا خزانہ نہیں ہے اور نہ ہی ہم اسے ایسا بننے دیں گے۔” انہوں نے یورپی یونین پر الزام عائد کیا کہ وہ امریکی کمپنیوں اور ٹیکس دہندگان سے غیر منصفانہ طور پر مالی فائدہ اٹھا رہی ہے۔ صدر ٹرمپ نے اعلان کیا کہ ان کی حکومت فوری طور پر اس امر کی تحقیقات شروع کرے گی کہ یورپی یونین کس طرح امریکی کمپنیوں کے ساتھ مبینہ طور پر امتیازی اور غیر منصفانہ سلوک کر رہی ہے۔ انہوں نے متنبہ کیا کہ یورپی یونین کو اس غیر قانونی اور غیر اخلاقی طرزِ عمل کی بہت بھاری قیمت چکانا پڑے گی۔

واضح رہے کہ یورپی یونین کے ریگولیٹرز نے گوگل پر آن لائن مسابقت کے قوانین کی خلاف ورزی کا الزام عائد کرتے ہوئے 890 ملین یورو کا جرمانہ عائد کیا تھا۔ یورپی حکام کے مطابق گوگل نے اپنی سرچ سروس اور ایپ اسٹور کا غلط استعمال کرتے ہوئے قوانین کو پامال کیا۔