ڈیمو کریٹس کو سمجھنا چاہیے کہ ہم نے ایران جنگ میں کتنی بڑی کامیابی حاصل کی:ٹرمپ

واشنگٹن: امریکی صدر ڈونلڈ ٹرمپ نے سوشل میڈیا پر جاری اپنے ایک اہم بیان میں دعویٰ کیا ہے کہ ان کی انتظامیہ نے ایران کے خلاف جنگ میں ایک تاریخی اور بڑی کامیابی حاصل کی ہے، جسے ڈیموکریٹس کو بھی تسلیم کرنا چاہیے۔ انہوں نے کہا کہ حالیہ معرکے میں ایران کو مکمل طور پر شکست کا سامنا کرنا پڑا ہے، جو عالمی سطح پر دہشت گردی کا سب سے بڑا سرپرست رہا ہے اور اسے قابو کرنا دنیا کے امن کے لیے ناگزیر ہو چکا تھا۔ ٹرمپ نے پچھلی ڈیموکریٹ حکومتوں کو شدید تنقید کا نشانہ بناتے ہوئے کہا کہ سابق صدر باراک اوباما نے ایران کو اربوں ڈالرز فراہم کیے اور اس کے خلاف امریکی فوج کا وہ استعمال ہی نہیں کیا جو کہ انتہائی ضروری تھا۔

امریکی صدر کا مزید کہنا تھا کہ خود ایرانی حکام بھی باراک اوباما اور جو بائیڈن کو انتہائی ناکام ترین لیڈرز سمجھتے تھے، اور ان کا یہ سمجھنا 100 فیصد درست تھا۔ ٹرمپ نے واضح کیا کہ ان کے برسرِ اقتدار آنے سے پہلے ایران مسلسل 47 برس تک خطے اور دنیا میں اپنی من مانی کرتا رہا کیونکہ ماضی کی امریکی قیادت کمزور تھی، لیکن ان کے اقتدار سنبھالتے ہی سب کچھ بدل گیا ہے اور اب امریکا ایک بار پھر دنیا کی سب سے بڑی اور طاقتور قوت بن کر سامنے آیا ہے۔