’’ایران کینسر ہے‘‘ ٹرمپ کا جنگ بندی ختم کرنے کا باضابطہ اعلان

امریکی صدر ڈونلڈ ٹرمپ نے ایران کے خلاف سخت ترین موقف اپناتے ہوئے جنگ بندی کا مفاہمت نامہ باضابطہ طور پر ختم کرنے کا اعلان کر دیا ہے اور ایران کو ‘کینسر’ سے تشبیہ دی ہے۔

انقرہ میں میڈیا سے گفتگو کرتے ہوئے امریکی صدر نے سخت لہجہ اختیار کیا اور کہا کہ ایرانی قیادت میں کچھ خرابی ہے، وہ بیمار اور دماغی طور پر برے ہیں، اور سب جانتے ہیں کہ کینسر کے ساتھ کیا کیا جاتا ہے۔ صدر ٹرمپ، جو چند ہفتے قبل تک ایرانی قیادت کی تعریفیں کر رہے تھے، اچانک شدید برہم نظر آئے اور انہوں نے کہا کہ کینسر کو جڑ سے اکھاڑ کر پھینکنا ہوتا ہے اور یہی اب ایران کے ساتھ ہونا چاہیے۔

امریکی صدر نے ایران کے ساتھ کسی بھی قسم کی ڈیل کے امکان کو مسترد کرتے ہوئے کہا کہ میری نظر میں ڈیل ختم ہو چکی ہے، میں اب اس (ایران) سے کوئی ڈیل نہیں کرنا چاہتا اور نہ ہی مزید مذاکرات کا قائل ہوں۔ اگر میرے لوگوں نے ایران سے بات کرنی ہے تو کریں، لیکن بالآخر فیصلہ کرنے کے لیے انہیں میرے پاس ہی آنا ہے۔

ڈونلڈ ٹرمپ نے دوٹوک انداز میں کہا کہ ایران کے لوگ خطرناک ہیں، ایران کسی صورت جوہری ہتھیار نہیں بنا سکتا اور ہم اسے ایسا کرنے بھی نہیں دیں گے۔ اس موقع پر انہوں نے نیٹو (NATO) کو بھی کڑی تنقید کا نشانہ بنایا اور کہا کہ وہ نیٹو سے خوش نہیں ہیں کیونکہ اس نے ایران کے خلاف امریکا کی مدد نہیں کی۔

واضح رہے کہ امریکا کی جانب سے ایران پر حالیہ حملوں کے بعد تہران نے بھی جوابی ردعمل کا اظہار کیا ہے۔ دونوں ممالک کے درمیان کشیدگی انتہائی سنگین صورتحال اختیار کر چکی ہے، جس کے بعد امریکا نے ایران کو تیل کی فروخت کی اجازت دینے والا لائسنس ایک بار پھر منسوخ کر دیا ہے۔