صحافی اور ویلاگر بلال غوری کے جسمانی ریمانڈ میں 2 روز کی توسیع

اسلام آباد: اسلام آباد کی ڈسٹرکٹ اینڈ سیشن کورٹ نے نیشنل سی آر آئی اے (NCCIA) کی درخواست پر سماعت کرتے ہوئے معروف صحافی اور ویلاگر بلال غوری کے جسمانی ریمانڈ میں مزید 2 دن کی توسیع کر دی ہے۔ 3 روزہ ابتدائی جسمانی ریمانڈ مکمل ہونے پر بلال غوری کو جوڈیشل مجسٹریٹ ملک امان کی عدالت میں پیش کیا گیا، جہاں این سی سی آئی اے کے تفتیشی افسر نے اکاؤنٹس کی ڈبل ویریفکیشن اور لاگ ان میں درپیش دشواریوں کا جواز پیش کرتے ہوئے مزید 6 دن کے ریمانڈ کی استدعا کی۔

بلال غوری کے وکیل عمران شفیق نے ریمانڈ کی شدید مخالفت کرتے ہوئے موقف اختیار کیا کہ جب موبائل، لیپ ٹاپ اور سوشل میڈیا اکاؤنٹس پہلے ہی این سی سی آئی اے کے قبضے میں ہیں اور درکار ریکوری مکمل ہو چکی ہے تو مزید ریمانڈ کا کوئی جواز نہیں بنتا۔ انہوں نے کہا کہ این سی سی آئی اے کو پہلے یہ ثابت کرنا ہوگا کہ بلال غوری کا کون سا بیان غلط تھا، جبکہ سماعت کے دوران صحافی بلال غوری نے بھی عدالت کو بتایا کہ تمام چیزیں تفتیشی ٹیم کے پاس موجود ہیں۔ فریقین کے دلائل سننے کے بعد جوڈیشل مجسٹریٹ ملک امان نے فیصلہ محفوظ کیا اور بعد میں محفوظ فیصلہ سناتے ہوئے جسمانی ریمانڈ میں 2 روز کی توسیع کا حکم دیتے ہوئے بلال غوری کو 12 ستمبر کو دوبارہ عدالت کے روبرو پیش کرنے کی ہدایت کر دی۔