ڈیرہ اسماعیل خان میں سکیورٹی فورسز کا آپریشن، 6 دہشتگرد ہلاک، 2 جوان شہید

ڈیرہ اسماعیل خان کے علاقے زرکانی میں سیکیورٹی فورسز نے انٹیلی جنس معلومات پر مبنی کامیاب آپریشن کرتے ہوئے بھارتی سرپرستی یافتہ ‘فتنۃ الخوارج’ کے 6 خوارج کو ہلاک کر دیا، جبکہ شدید فائرنگ کے تبادلے میں پاک فوج کے 2 جوان شہید ہو گئے۔

پاک فوج کے شعبۂ تعلقات عامہ (ISPR) کے مطابق، یہ آپریشن 24 اکتوبر کو علاقے میں خوارج کی موجودگی کی اطلاع پر کیا گیا۔ سیکیورٹی فورسز نے کارروائی کرتے ہوئے 6 دہشت گردوں کو جہنم واصل کر دیا اور ان کے قبضے سے بھاری مقدار میں اسلحہ و گولہ بارود برآمد کر لیا۔ فائرنگ کے شدید تبادلے کے دوران 36 سالہ نائیک غلام مرتضیٰ (ساکن ضلع گجرات) اور 30 سالہ سپاہی تاثیر احمد (ساکن ضلع تلہ گنگ) بہادری سے لڑتے ہوئے جامِ شہادت نوش کر گئے۔ ہلاک ہونے والے خوارج فورسز اور معصوم شہریوں پر متعدد دہشت گرد حملوں میں ملوث تھے۔

ترجمان پاک فوج کا کہنا ہے کہ علاقے میں موجود دیگر دہشت گردوں کے خاتمے کے لیے کلیئرنس آپریشن جاری ہے۔ آئی ایس پی آر کے مطابق وفاقی ایپکس کمیٹی کے منظور کردہ قومی ایکشن پلان اور وژن ‘عزمِ استحکام’ کے تحت سیکیورٹی فورسز اور قانون نافذ کرنے والے اداروں کی انسدادِ دہشت گردی کی کارروائیاں بلا تعطل جاری رہیں گی تاکہ ملک سے بیرونی حمایت یافتہ دہشت گردی کی جڑوں کا مکمل خاتمہ ممکن بنایا جا سکے۔