اسحاق ڈار کی جماعت اسلامی کے وفد سے ملاقات، پٹرولیم قیمتوں اور عوامی ریلیف پر تبادلہ خیال

نائب وزیراعظم و وزیرِ خارجہ سینیٹر محمد اسحاق ڈار سے جماعتِ اسلامی کے ایک اعلیٰ سطحی وفد نے ملاقات کی، جس کے دوران پٹرولیم مصنوعات کی قیمتوں، توانائی کے شعبے کے مسائل اور عوام کو فوری معاشی ریلیف فراہم کرنے کے اقدامات پر تفصیلی تبادلہ خیال کیا گیا۔

ترجمان دفترِ خارجہ کے مطابق جماعتِ اسلامی کے وفد کی قیادت پارٹی کے نائب امیر لیاقت بلوچ نے کی۔ ملاقات کے دوران عام آدمی کو درپیش معاشی مشکلات، مہنگائی کے اثرات اور بالخصوص کم آمدنی والے طبقے پر معاشی بوجھ کم کرنے کے مختلف عملی پہلوؤں پر خصوصی توجہ دی گئی۔

ملاقات میں دونوں فریقین نے پٹرولیم مصنوعات، توانائی کی قیمتوں اور عوامی ریلیف کے حوالے سے باہمی مشاورت کا سلسلہ آگے بھی جاری رکھنے پر مکمل اتفاق کیا۔ اس موقع پر گفتگو کرتے ہوئے نائب وزیراعظم اسحاق ڈار نے حکومت کی جانب سے عوامی فلاح و بہبود کو اولین ترجیح دینے اور عام شہریوں کو سہولیات فراہم کرنے کے پختہ عزم کا اعادہ کیا۔ اسحاق ڈار کا مزید کہنا تھا کہ موجودہ قومی معاشی چیلنجز سے مؤثر انداز میں نمٹنے کے لیے تمام سیاسی جماعتوں کے درمیان مسلسل مکالمہ اور مشاورت انتہائی کلیدی اہمیت رکھتی ہے۔