ڈنمارک نے دمشق میں 14 سال بعد سفارتخانہ دوبارہ کھول دیا

دمشق/کوپن ہیگن: ڈنمارک نے شام کے دارالحکومت دمشق میں تقریباً 14 سال کی طویل مدت کے بعد اپنا سفارتخانہ باضابطہ طور پر دوبارہ فعال کر دیا ہے۔

سفارتخانے کی افتتاحی تقریب میں ڈنمارک کے وزیر خارجہ لارس لوکے راسموسن اور شامی ہم منصب اسعد الشیبانی نے شرکت کی۔ اس موقع پر ڈنمارک نے 2012 کے بعد شام کے لیے اپنا پہلا مستقل سفیر بھی تعینات کر دیا ہے۔ تقریب کے دوران ڈنمارک کے وزیر خارجہ نے شام کی بحالی، علاقائی استحکام اور پناہ گزینوں کی باوقار واپسی کی حمایت کے لیے 76 ملین ڈالر کے اضافی امدادی پیکیج کا بھی اعلان کیا۔

دونوں ممالک کے مابین دوطرفہ شراکت داری کے معاہدے کی تیاری پر اتفاق ہوا ہے، جبکہ دمشق اور کوپن ہیگن کے درمیان 21 ستمبر سے براہِ راست پروازیں شروع کرنے کا بھی اعلان کیا گیا ہے۔ یورپی ملک ڈنمارک کے اس اقدام کو شام اور یورپی یونین کے رکن ممالک کے درمیان سفارتی تعلقات کی بحالی اور تعمیرِ نو کے سفر میں ایک اہم پیش رفت قرار دیا جا رہا ہے۔