کشمیر میں انسانی حقوق کی خلاف ورزیوں پر شدید اظہارِ تشویش

کشمیر کی معروف حریت رہنما یٰسین ملک کی اہلیہ مشعال ملک اور پاکستان ہندو کونسل کے پیٹرن اِن چیف ڈاکٹر رمیش کمار نے اسلام آباد میں مشترکہ پریس کانفرنس کرتے ہوئے کشمیر میں جاری انسانی حقوق کی خلاف ورزیوں، اقلیتوں پر مظالم اور یٰسین ملک کے خلاف مبینہ جھوٹے مقدمات پر شدید تشویش کا اظہار کیا۔ ڈاکٹر رمیش کمار نے مشعال ملک اور ان کی بیٹی کا دفتر آمد پر خیرمقدم کیا اور کہا کہ مسئلہ کشمیر 70 سال سے حل طلب ہے، مگر کشمیریوں کی قربانیاں کبھی رائیگاں نہیں جائیں گی۔

ڈاکٹر رمیش کمار نے کہا کہ پاکستان کی حکومت، عوام اور افواج کشمیر کے ساتھ کھڑی ہیں۔ انہوں نے انکشاف کیا کہ وہ بھارتی وزیراعظم نریندر مودی اور سابق وزیرِ خارجہ سشما سوراج کو واضح کر چکے ہیں کہ کشمیر کا حل ناگزیر ہے۔ ان کا کہنا تھا کہ جب تک تمام قیدی رہا نہیں کیے جاتے، مسئلہ برقرار رہے گا۔ انہوں نے کہا کہ اگر بھارت جنگ کی صورت میں امریکہ کو ثالثی کے لیے کہہ سکتا ہے تو کشمیر جیسے سنگین انسانی مسئلے پر بھی عالمی طاقتوں کو کردار ادا کرنا چاہیے۔

ڈاکٹر رمیش کمار نے کہا کہ وہ ہمیشہ انسانی حقوق کی خلاف ورزیوں پر آواز بلند کرتے ہیں، خواہ مسئلہ کسی بھی کمیونٹی کا ہو۔ انہوں نے کہا کہ “آج مسلمان اور ہندو ایک ساتھ بیٹھے ہیں، یہی انسانیت ہے۔” ان کا کہنا تھا کہ سندھ کبھی بھارت کا حصہ نہیں رہا، اور جہاں مسئلہ ختم ہوا تھا، وہیں سے حل کا آغاز ہونا چاہئے۔

مشعال ملک نے پریس کانفرنس سے خطاب کرتے ہوئے کہا کہ دنیا کا سب سے بڑا مذہب انسانیت ہے، مگر بدقسمتی سے بھارت اور کشمیر میں انسانیت سسک رہی ہے۔ انہوں نے کہا کہ یٰسین ملک کو جھوٹے الزامات لگاکر پھانسی دینے کی کوشش کی جارہی ہے اور چار سال سے سزائے موت کی خبریں گردش کر رہی ہیں۔ مشعال ملک نے کہا کہ وہ یٰسین ملک کی جان بچانے کے لیے عالمی سطح پر مہم شروع کر چکی ہیں، جس کے لیے ڈیجیٹل کمپین اور بھرپور عوامی رابطہ مہم جاری ہوگی۔

انہوں نے دعویٰ کیا کہ بھارت میں چرچز کو مسمار کیا جارہا ہے، اقلیتوں کو نشانہ بنایا جارہا ہے، حتیٰ کہ ایک مقام پر انسان کا کٹا ہوا گوشت اس کے اہلخانہ کے حوالے کیا گیا — جو انتہائی افسوسناک اور قابلِ مذمت ہے۔ مشعال ملک نے کہا کہ یٰسین ملک کے کیس کو بین الاقوامی سطح پر اُجاگر کرنے کے لیے ویب سائٹ بھی جلد لانچ کی جائے گی۔

مشعال ملک نے قوم سے اپیل کی کہ “سیو یٰسین ملک” مہم کا حصہ بنیں اور اس تحریک کو زندہ رکھیں۔ انہوں نے کہا کہ وہ گھر گھر جا کر مہم چلائیں گی اور عوامی حمایت حاصل کریں گی۔

پریس کانفرنس کے اختتام پر ڈاکٹر رمیش کمار اور مشعال ملک نے اس عزم کا اظہار کیا کہ کشمیر اور اقلیتوں کے انسانی حقوق کے لیے جدوجہد جاری رکھیں گے۔