تصاویر کے پیچھے ایک حقیقی انسان موجود ہوتا ہے: دنانیر مبین

پاکستانی اداکارہ دنانیر مبین نے سوشل میڈیا پر اپنی جلد (ایکنی) کے مسائل پر کھل کر بات کرتے ہوئے مداحوں کو حقیقی زندگی اور سوشل میڈیا کے فرق سے آگاہ کیا ہے۔ انسٹاگرام پر ایک تفصیلی پوسٹ شیئر کرتے ہوئے انہوں نے بتایا کہ گزشتہ چند ماہ ان کی جلد کے لیے انتہائی مشکل رہے، جس کی وجوہات تیز روشنیاں، روزانہ کا بھاری میک اپ اور ہارمونز کی تبدیلیاں تھیں۔ دنانیر نے اپنی ‘ایکنی’ سے پہلے اور بعد کی تصاویر شیئر کرتے ہوئے واضح کیا کہ وہ فلٹر شدہ تصاویر جیسی نہیں دکھتیں بلکہ ایک عام انسان ہیں، اس لیے لوگوں کو تنقید کے بجائے نرمی کا مظاہرہ کرنا چاہیے۔ اداکارہ ہانیہ عامر نے بھی دنانیر کی اس ہمت کو سراہتے ہوئے ان کی پوسٹ اپنی انسٹاگرام اسٹوری پر شیئر کی، جسے سوشل میڈیا صارفین کی جانب سے مثبت ردعمل مل رہا ہے۔