ایرانی میزائل حملے کے بعد خام تیل کی قیمتوں میں 4 فیصد سے زائد اضافہ

امریکی افواج پر ایرانی بیلسٹک میزائل حملوں کی تصدیق کے فوراً بعد عالمی منڈی میں خام تیل کی قیمتوں میں اچانک بڑا اضافہ ریکارڈ کیا گیا ہے۔ رپورٹ کے مطابق امریکی خام تیل کی قیمت 4 فیصد سے زائد بڑھ کر 82 ڈالر فی بیرل کی سطح سے تجاوز کر گئی ہے۔ اس کے ساتھ ہی بین الاقوامی معیار کے برینٹ خام تیل کی قیمت بھی اضافے کے بعد 88 ڈالر فی بیرل سے اوپر چلی گئی ہے۔

اس سے قبل منگل کے روز واشنگٹن کی جانب سے ایران پر فضائی حملے اچانک روکنے کے بعد عالمی مارکیٹ میں تیل کی قیمتوں میں نمایاں کمی دیکھی گئی تھی، جبکہ سرمایہ کار امریکا اور ایران کے درمیان ممکنہ مذاکرات اور سفارتی پیش رفت پر نظریں جمائے ہوئے تھے۔ تاہم، ایرانی فوجی ردِعمل اور تازہ حملے کی خبر سامنے آتے ہی تیل کی عالمی منڈی میں ایک بار پھر بے یقینی پھیلی اور قیمتیں تیزی سے اوپر چلی گئیں۔