سندھ طاس معاہدہ مکمل طور پر نافذالعمل ہے: عالمی ثالثی عدالت

عالمی ثالثی عدالت (Permanent Court of Arbitration) نے سندھ طاس معاہدے سے متعلق پاکستان کے قانون و آئینی موقف کی مکمل تائید کرتے ہوئے فیصلہ دیا ہے کہ 1960 کا سندھ طاس معاہدہ مکمل طور پر نافذ العمل ہے اور بھارت اس کی تمام شقوں اور بین الاقوامی ذمہ داریوں کی پاسداری کا پابند ہے۔

عالمی عدالت نے بھارت کی جانب سے سندھ طاس معاہدے کو ’التوا میں رکھنے‘ یا معطل کرنے کے اقدام کو قانوناً غیر مؤثر قرار دیتے ہوئے واضح کیا کہ بھارت کے پاس معاہدے کو یکطرفہ طور پر معطل یا ختم کرنے کی کوئی قانونی بنیاد موجود نہیں ہے۔ متفقہ فیصلے میں قرار دیا گیا کہ دریائے سندھ، جہلم اور چناب پر بھارت کی جانب سے تعمیر کیے جانے والے تمام پن بجلی منصوبے ہر صورت سندھ طاس معاہدے کی تکنیکی و قانونی پابندیوں کے تابع ہوں گے۔

عدالت نے مقبوضہ کشمیر میں تعمیر کیے جانے والے رتلے ہائیڈرو الیکٹرک پاور پروجیکٹ پر پاکستان کی جانب سے دائر عبوری اقدامات کی درخواست بھی منظور کر لی۔ فیصلے کے تحت بھارت کو رتلے ڈیم کی مین وال اور پاور انٹیک اسٹرکچر کے مخصوص حصوں پر مزید کنکریٹ ڈالنے سے فوری طور پر روک دیا گیا ہے۔ یہ پابندیاں نیوٹرل ایکسپرٹ کے حتمی فیصلے کے 90 روز بعد تک برقرار رہیں گی، جبکہ اس کیس پر غیر جانبدار ماہر کا فیصلہ جولائی 2027 میں متوقع ہے۔ عالمی ثالثی عدالت نے واضح کیا کہ حساس معلومات کو حذف کرنے کے بعد فیصلے کی مکمل کاپی ویب سائٹ پر جاری کی جائے گی۔