عوامی ٹرانسپورٹ میں اوورچارجنگ، اوورلوڈنگ کیخلاف سخت کارروائی کا حکم

وزیراعلیٰ پنجاب مریم نواز شریف نے عیدالاضحیٰ کے پرمسرت موقع پر گھروں کو لوٹنے والے مسافروں کی سہولت اور تحفظ کے لیے ایک بڑا قدم اٹھاتے ہوئے عوامی ٹرانسپورٹ میں اوورچارجنگ (زائد کرایہ)، اوورلوڈنگ اور ان فٹ گاڑیوں کے خلاف صوبہ بھر میں سخت اور بلاامتیاز کارروائی کا حکم دے دیا ہے۔ وزیراعلیٰ نے پنجاب کی تمام ضلعی انتظامیہ، ڈپٹی کمشنرز (DCs) اور ڈی پی اوز (DPOs) کو فیلڈ میں نکل کر تمام بسوں اور لاری اڈوں کی مانیٹرنگ اور چیکنگ کو ہر صورت یقینی بنانے کی سخت ہدایت کی ہے

وزیراعلیٰ مریم نواز شریف نے ٹرانسپورٹ مافیا کے خلاف سخت ترین تادیبی اقدامات کا اعلان کرتے ہوئے درج ذیل احکامات جاری کیے ہیں:

 پنجاب کے ہر لاری اڈے، بس سٹینڈ اور گاڑی کے اندر منظور شدہ سرکاری کرایہ نامہ واضح طور پر آویزاں کیا جائے تاکہ کوئی بھی ٹرانسپورٹر مسافروں سے زائد کرایہ نہ بٹور سکے۔ جو بھی ٹرانسپورٹر یا بس کمپنی اوورچارجنگ میں ملوث پائی گئی، اس کا روٹ پرمٹ فوری طور پر منسوخ کر دیا جائے گا اور ایسے بس سٹینڈز کے مالکان کے خلاف کارروائی کرتے ہوئے ان کے اجازت نامے (لائسنس) بھی ضبط کر لیے جائیں گے۔

محکمہ ٹرانسپورٹ پنجاب نے وزیراعلیٰ کی ہدایت پر عید کے دوران مسافروں کی شکایات کا فوری ازالہ کرنے کے لیے ایک مخصوص اور فعال ہیلپ لائن “1071” قائم کر دی ہے۔پنجاب بھر کے شہری اور مسافر عید کی تعطیلات کے دوران کسی بھی روٹ پر اوورچارجنگ، بدتمیزی یا اوورلوڈنگ سے متعلق اپنی شکایات اس ٹول فری نمبر پر فوری درج کروا سکتے ہیں، جس پر ضلعی انتظامیہ اور ٹرانسپورٹ اتھارٹی کے حکام موقع پر پہنچ کر ہنگامی کارروائی عمل میں لائیں گے۔