مکہ دفاعی معاہدہ خطے میں مشترکہ سلامتی کے نئے باب کا آغاز ہے: سرفراز بگٹی

وزیراعلیٰ بلوچستان میر سرفراز بگٹی نے مکہ مکرمہ میں پاکستان، سعودی عرب اور ترکیہ کے درمیان طے پانے والے مشترکہ دفاعی معاہدے کو ایک تاریخی پیشرفت اور خطے میں امن و استحکام کا اہم سنگِ میل قرار دیا ہے۔

اپنے ایک بیان میں وزیراعلیٰ بلوچستان نے کہا کہ یہ مشترکہ دفاعی معاہدہ تینوں برادر اسلامی ممالک کے مابین باہمی اعتماد، گہرے تعلقات اور اسٹریٹجک شراکت داری کو نئی قوت اور توانائی بخشے گا۔ انہوں نے زور دیا کہ تینوں طاقتور ریاستوں کا دفاعی تعاون مسلم امہ کے اجتماعی مفادات کے تحفظ میں کلیدی کردار ادا کرے گا اور یہ معاہدہ محفوظ، مستحکم اور خوشحال مستقبل کے لیے ہمارے مشترکہ عزم کا عکس ہے۔

میر سرفراز بگٹی نے اس تاریخی پیشرفت کو ممکن بنانے پر وزیراعظم پاکستان اور فیلڈ مارشل کے کردار کی تعریف کی اور کہا کہ یہ اقدام خطے میں مشترکہ سلامتی کی سمت ایک نیا موڑ ہے۔ انہوں نے دعا کی کہ اللہ تعالیٰ اس تاریخی معاہدے کو پاکستان، سعودی عرب، ترکیہ اور پوری مسلم امہ کے لیے خیر و برکت، امن اور کامیابی کا ذریعہ بنائے۔