چینی صدر کی مصری ہم منصب سے ملاقات، مشرق وسطیٰ کے جامع حل پر زور

چینی صدر شی جن پنگ اپنے سرکاری دورے پر مصر پہنچے ہیں، جہاں انہوں نے قاہرہ میں مصری صدر عبدالفتاح السیسی سے اہم ملاقات کی۔ چینی سرکاری خبر ایجنسی کے مطابق دونوں رہنماؤں نے خطے کی صورتحال پر تفصیلی تبادلہ خیال کیا۔ اس موقع پر صدر شی جن پنگ نے مشرق وسطیٰ میں مشترکہ سلامتی اور ایک نیا سیکیورٹی نظام تشکیل دینے کے لیے جامع حل پر زور دیتے ہوئے کہا کہ علاقائی ممالک اور عوام کو اپنے معاملات کا خود مالک ہونا چاہیے اور بیرونی مداخلت کو مسترد کرنا چاہیے۔ انہوں نے مزید واضح کیا کہ مسئلہ فلسطین مشرق وسطیٰ کا مرکزی اور بنیادی معاملہ ہے، جسے کسی صورت پسِ پشت یا نظر انداز نہیں کیا جا سکتا۔