امریکا چین کے بنیادی مفادات کا احترام کرے: چینی وزیر خارجہ

چین کے وزیر خارجہ وانگ ژی نے امریکہ پر زور دیا ہے کہ وہ چین کے بنیادی مفادات کا احترام کرے، باہمی اختلافات کو ذمہ داری کے ساتھ سنبھالے اور بیجنگ کے جائز خدشات کو دور کرے۔ انہوں نے یہ بات امریکی وزیر خارجہ مارکو روبیو سے ایک اہم ملاقات کے بعد کہی۔

وانگ ژی کا کہنا تھا کہ دونوں رہنماؤں کے درمیان ہونے والی بات چیت انتہائی عملی، مثبت اور تعمیری رہی۔ انہوں نے بتایا کہ دونوں ممالک چینی صدر شی جن پنگ کے متوقع دورۂ امریکہ کی تیاریوں میں مصروف ہیں، جبکہ فریقین اعلیٰ سطحی مذاکرات کے اگلے مرحلے کی تیاری پر بھی متفق ہو گئے ہیں۔ چینی وزیر خارجہ کے مطابق، بیجنگ نے واشنگٹن پر ایک بار پھر “ون چائنا” پالیسی کی مکمل پاسداری پر زور دیا ہے، جسے چین دوطرفہ تعلقات کی سب سے اہم بنیاد قرار دیتا ہے۔

چینی وزیر خارجہ نے مزید انکشاف کیا کہ صدر شی جن پنگ کا دورۂ امریکہ رواں سال ستمبر میں متوقع ہے، جس کے دوران دونوں ممالک کے درمیان اہم دوطرفہ، اقتصادی اور عالمی امور پر مفصل بات چیت کا امکان ہے۔