ایران پر امریکی پابندیاں، چین کا اپنے مفادات کیلئے ضروری اقدامات کا اعلان

بیجنگ: امریکا کی جانب سے ایران کے خلاف اب تک کی سب سے بڑی مالیاتی پابندیوں کے اعلان کے بعد چین نے سخت موقف اختیار کرتے ہوئے اپنے قومی و معاشی مفادات کا ہر قیمت پر تحفظ کرنے کا اعلان کر دیا ہے۔

چینی وزارتِ خارجہ کے ترجمان لین جیان نے پریس بریفنگ کے دوران کہا کہ چین غیر قانونی یکطرفہ پابندیوں کی ہمیشہ کی طرح شدید مخالفت کرتا ہے۔ ان کا کہنا تھا کہ معاشی جنگ اور دباؤ کی پالیسی مسائل کے حل میں مددگار ثابت نہیں ہو سکتی بلکہ یہ اقدامات عالمی اقتصادی اور مالیاتی نظام کو شدید نقصان پہنچاتے ہیں۔ انہوں نے واضح کیا کہ بیجنگ اپنے جائز حقوق اور معاشی مفادات کا دفاع کرنے کے لیے تمام ضروری اقدامات کرے گا۔

یہ ردِعمل امریکی وزیرِ خزانہ سکاٹ بیسنٹ (Scott Bessent) کے اس بیان کے بعد سامنے آیا ہے جس میں انہوں نے ایران کے خلاف نئی پابندیوں کو “اقتصادی ڈی ڈے” (Economic D-Day) اور تاریخ کی سب سے بڑی مالیاتی کارروائی قرار دیا تھا۔ امریکی وزیرِ خزانہ نے خبردار کیا تھا کہ ایران کے ساتھ مالی شراکت داری رکھنے والے ممالک اور اداروں کو بھی عالمی اقتصادی نظام سے الگ تھلگ کر دیا جائے گا۔

واضح رہے کہ چین ایران کا سب سے بڑا تجارتی اور معاشی شراکت دار ہے۔ چین کے اس اعلان کے بعد دونوں عالمی طاقتوں کے درمیان معاشی کشیدگی اور تجارتی تنازع میں مزید اضافے کا خدشہ پیدا ہو گیا ہے۔