چین میں 31 دسمبر تک شادی رجسٹر کرانے والوں کے لیے کیش انعام کا اعلان

چین کے مشرقی شہر نِنگبو میں شادی کے خواہش مند جوڑوں کے لیے اہم خوشخبری سامنے آئی ہے، جہاں مقامی انتظامیہ نے مخصوص مدت کے اندر شادی رجسٹر کرانے والوں کو کیش واؤچرز دینے کا اعلان کردیا ہے۔

غیر ملکی خبر ایجنسی کے مطابق 28 اکتوبر سے 31 دسمبر تک اپنی شادی رجسٹر کرانے والے ہر نئے جوڑے کو ایک ہزار یوان (تقریباً 40 ہزار پاکستانی روپے) مالیت کے خصوصی واؤچرز جاری کیے جائیں گے۔ یہ اقدام نوجوان نسل کو شادی اور خاندانی نظام کی جانب راغب کرنے کی حکومتی کوششوں کا حصہ ہے۔

گزشتہ برس چین میں شادیوں کی شرح میں ریکارڈ کمی دیکھی گئی، جس کی بڑی وجہ بچوں کی دیکھ بھال اور تعلیم کے بڑھتے ہوئے اخراجات بتائے جاتے ہیں۔

نِنگبو سول افیئرز ڈپارٹمنٹ کے مطابق یہ واؤچرز شادی کی فوٹوگرافی، تقریبات، ہوٹل میں قیام اور شادی سے متعلق مختلف خدمات پر استعمال کیے جا سکیں گے۔ واؤچرز محدود تعداد میں دستیاب ہیں اور “پہلے آئیں، پہلے پائیں” کی بنیاد پر دیے جائیں گے۔

چین کے دیگر مشرقی شہروں نے بھی اسی نوعیت کے اقدامات متعارف کرائے ہیں، جن کے تحت سال کے اختتام تک کیش واؤچرز فراہم کیے جائیں گے۔

واضح رہے کہ چین کی آبادی 1.4 ارب کے ساتھ دنیا کی دوسری بڑی آبادی ہے، تاہم شرح پیدائش میں تیزی سے کمی اور بڑھتی ہوئی عمر رسیدہ آبادی حکام کے لیے بڑا چیلنج بن چکی ہے۔ گزشتہ سال حکومت نے اس صورتحال سے نمٹنے کے لیے کالجوں اور یونیورسٹیوں میں “محبت کی تعلیم” کے نام سے پروگرام چلانے کی ہدایت بھی کی تھی، تاکہ نوجوان نسل کو شادی اور خاندان کی اہمیت سے آگاہ کیا جا سکے۔