چکوال: بس کھائی میں گرنے سے 5 مسافر جاں بحق، 7 خواتین سمیت 27 زخمی

تلہ گنگ کے قریب ڈھوک پٹھان میں مسافر بس کھائی میں گرنے سے 5 افراد جاں بحق اور 27 زخمی ہو گئے۔ پولیس اور ریسکیو حکام کے مطابق بس راولپنڈی سے کراچی جا رہی تھی کہ موڑ کاٹتے ہوئے حادثے کا شکار ہو گئی۔ اطلاع ملتے ہی امدادی ٹیمیں اور پولیس موقع پر پہنچ گئیں اور جاں بحق افراد و زخمیوں کو ٹی ایچ کیو تلہ گنگ منتقل کیا گیا۔ ریسکیو حکام کے مطابق زخمیوں میں 7 خواتین بھی شامل ہیں جبکہ متعدد زخمیوں کی حالت تشویشناک بتائی جا رہی ہے۔ پولیس نے واقعے کی تحقیقات شروع کر دی ہیں۔