امریکی فوج نے ایران کے خلاف حملوں کی نئی لہر کا آغاز کر دیا، سینٹ کام

امریکی سینٹرل کمانڈ (سینٹ کام) نے تصدیق کی ہے کہ امریکی فوج نے ایران کے خلاف فضائی حملوں کی ایک اور نئی لہر کا آغاز کر دیا ہے۔ سوشل میڈیا پر جاری کردہ ایک سرکاری پیغام میں سینٹ کام کا کہنا تھا کہ امریکی فوج نے مسلسل چھٹی رات ایران کے خلاف ان کارروائیوں کا سلسلہ جاری رکھا ہوا ہے، جس کا بنیادی مقصد ایرانی فوج کی جنگی اور دفاعی صلاحیت کو مزید کمزور کرنا ہے۔ واضح رہے کہ گزشتہ روز بھی امریکی سینٹرل کمانڈ نے ایران کے خلاف حملوں کی دوسری لہر شروع کرنے کا اعلان کیا تھا۔

سینٹ کام کے اس تازہ اعلان کے فوراً بعد عراق کی سرحد کے قریب واقع ایرانی شہر اہواز، اور ساحلی شہروں چابہار اور بندر عباس میں شدید دھماکوں کی آوازیں سنی گئیں۔ مقامی میڈیا اور رپورٹس کے مطابق ان تازہ حملوں کے دوران ایک کینسر ہسپتال کے قریبی علاقوں میں بھی بمباری کی اطلاعات موصول ہوئی ہیں، جس سے شہری آبادی میں سخت خوف و ہراس پھیل گیا ہے۔