ضمنی انتخابات کی مہم ختم، کُل 13 حلقوں میں پولنگ ہوگی

قومی اور صوبائی اسمبلی کے مجموعی طور پر 13 حلقوں میں ضمنی انتخابات کے لیے انتخابی مہم کا وقت ختم ہوگیا ہے۔ الیکشن قوانین کے مطابق آج رات 12 بجے کے بعد کوئی بھی جماعت یا امیدوار انتخابی مہم نہیں چلا سکے گا۔

قومی اسمبلی کے چھ حلقوں—این اے 18 ہری پور، این اے 129 لاہور، این اے 143 ساہیوال، این اے 185 ڈی جی خان، این اے 96 فیصل آباد اور این اے 104 فیصل آباد—میں ضمنی انتخابات اتوار کو ہوں گے۔

اسی طرح صوبائی اسمبلی کے سات حلقوں پی پی 98، پی پی 115، پی پی 116، پی پی 73 سرگودھا، پی پی 87 میانوالی، پی پی 203 ساہیوال اور پی پی 269 مظفرگڑھ میں بھی کل پولنگ کا انعقاد کیا جائے گا۔

الیکشن کمیشن کے مطابق مقررہ وقت کے بعد انتخابی سرگرمیاں جاری رکھنا قانوناً ممنوع ہے اور اس حوالے سے کارروائی بھی کی جاسکتی ہے۔