پاکستان کھپے، بلاول بھٹو زرداری کا یوم آزادی پر ویڈیو پیغام جاری

پاکستان پیپلزپارٹی کے چیئرمین بلاول بھٹو زرداری نے وطنِ عزیز پاکستان کے 79ویں یومِ آزادی کے پرمسرت موقع پر قوم کے نام ایک خصوصی ویڈیو پیغام جاری کیا ہے۔ اپنے پیغام میں انہوں نے تمام پاکستانیوں کو مبارکباد دیتے ہوئے کہا کہ پاکستان کو آزاد ہوئے 79 سال مکمل ہو چکے ہیں اور اب سے محض 21 سال بعد قوم اپنی آزادی کی سنچری منائے گی۔ انہوں نے اس بات پر زور دیا کہ آزادی محض ایک جغرافیائی خطہ حاصل کرنے کا نام نہیں تھا، بلکہ یہ ان علاقوں، ریاستوں اور لوگوں سے بنیادی حقوق کی فراہمی کا ایک مقدس وعدہ تھا جنہوں نے پاکستان کا حصہ بننے کا انتخاب کیا تھا۔

بلاول بھٹو زرداری کا کہنا تھا کہ ہم نے اس تاریخی اور آئینی وعدے کو اپنے آئین کا حصہ بنایا، اسے زبان سے بار بار دہرایا مگر ہمیشہ اسے مکمل طور پر نبھایا نہیں۔ انہوں نے آئندہ کی حکمتِ عملی پر روشنی ڈالتے ہوئے کہا کہ 2047 میں آزادی کی سنچری تک ہماری نسل کا اصل کام اس آئینی وعدے کو ہر غریب اور متوسط گھر تک پہنچانا ہے، تاکہ ہر شخص محنت سے اپنا گھر چلا سکے، نوجوانوں کو باوقار روزگار میسر آئے، ہر ووٹ کے تقدس کا احترام ہو اور ہر خطے کو قومی ترقی میں اس کا جائز حصہ ملے۔ انہوں نے اپنے پیغام کا اختتام “آزادی ہر گھر تک، جشنِ آزادی مبارک، پاکستان کھپے، پاکستان پائندہ باد” کے نعروں کے ساتھ کیا۔