ڈیجیٹل بینکنگ صارفین کی تعداد 13 کروڑ 70 لاکھ تک پہنچ گئی: بلال کیانی

وزیرِ مملکت برائے خزانہ بلال اظہر کیانی نے اسلام آباد میں میڈیا سے گفتگو کرتے ہوئے بتایا کہ ملک میں ڈیجیٹل بینکنگ صارفین کی تعداد 13 کروڑ 70 لاکھ تک پہنچ گئی ہے، جبکہ ڈیجیٹل ادائیگیوں کو آسان بنانے اور کیش لیس معیشت کے فروغ میں اسٹیٹ بینک کے ‘راست’ نظام نے کلیدی کردار ادا کیا ہے۔ انہوں نے بتایا کہ ڈیجیٹل طریقے استعمال کرنے والے تاجروں کی تعداد بھی 20 لاکھ سے تجاوز کر چکی ہے۔ بلال اظہر کیانی نے مزید کہا کہ مرکزی سرکاری اداروں کی ڈیجیٹل ادائیگیاں 9 فیصد سے بڑھ کر 76 فیصد ہو گئی ہیں، اور حکومت نے کیو آر کوڈز کے ذریعے خریدو فروخت کو فروغ دینے کے لیے مرچنٹ ڈسکاؤنٹ ریٹ (MDR) پر سبسڈی بھی فراہم کی ہے۔