امریکی سینیٹر برنی سینڈرز نے غزہ کی صورتحال کا ذمہ دار امریکا کو قرار دیدیا

امریکی سینیٹر برنی سینڈرز نے غزہ میں جاری انسانی بحران اور تباہی کا ذمہ دار امریکا کو قرار دیتے ہوئے کہا ہے کہ عالمی قوانین کی خلاف ورزیوں کے باوجود اسرائیل کو اربوں ڈالر کی فوجی امداد فراہم کر کے امریکا اس تمام صورتحال میں برابر کا شریک ہے۔ برنی سینڈرز نے بتایا کہ جنگ بندی کے باوجود اسرائیل غزہ کے 70 فیصد علاقے پر کنٹرول حاصل کر چکا ہے اور مستقل قبضے کے منصوبے پر عمل پیرا ہے۔ انہوں نے انکشاف کیا کہ غزہ کے 92 فیصد مکانات تباہ یا متاثر ہو چکے ہیں، 70 فیصد آبادی مناسب چھت سے محروم ہے اور 91 فیصد بچے تعلیم سے محروم ہونے کے ساتھ شدید غذائی قلت کا شکار ہیں۔ انہوں نے زور دیا کہ امریکی عوام کی اکثریت اسرائیل کو ملٹری ایڈ بند کرنے کی حامی ہے، اس لیے امریکی کانگریس کو عوامی رائے کا احترام کرتے ہوئے اسرائیل کی تمام فوجی امداد فوری طور پر بند کرنی چاہیے۔