نیتن یاہو نے ایران کے ساتھ سفارتی معاہدے کے امکانات مسترد کردیے

اسرائیلی وزیراعظم بنیامین نیتن یاہو نے ایران کے ساتھ سفارتی معاہدے کے امکانات کو مسترد کرتے ہوئے کہا ہے کہ موجودہ ایرانی قیادت کے ساتھ کسی قابلِ اعتماد یا نتیجہ خیز معاہدے تک پہنچنا ممکن نہیں۔ فرانسیسی خبر رساں ادارے کے مطابق ایک تقریب سے خطاب کرتے ہوئے نیتن یاہو نے انکشاف کیا کہ انہوں نے امریکی صدر ڈونلڈ ٹرمپ کے ساتھ حالیہ ملاقات میں ایران کے معاملے پر گفتگو کی ہے، تاہم سفارتی راستے سے متعلق ان کی امیدیں انتہائی محدود ہیں۔ نیتن یاہو نے ایران پر مزید مالی و اقتصادی پابندیاں عائد کرنے پر امریکی صدر کی مہم کی تعریف بھی کی۔ اسرائیلی وزیراعظم کا یہ بیان ایک ایسے وقت میں سامنے آیا ہے جب خطے بالخصوص آبنائے ہرمز میں کشیدگی برقرار ہے اور تجزیہ کاروں کے مطابق ان حالات میں سفارت کاری اور فوجی دباؤ میں توازن قائم رکھنا واشنگٹن اور تل ابیب کے لیے بڑا چیلنج بن چکا ہے۔