غزہ کے ہسپتالوں میں زندگی اور موت کی جنگ، دواؤں کی شدید قلت

غزہ میں دواؤں کی شدید کمی کے باعث ہسپتالوں میں زیرِ علاج ہزاروں مریضوں کی زندگیاں خطرے میں پڑ گئی ہیں۔ غزہ کے محکمۂ صحت کے مطابق ضروری ادویات کی قلت سے علاج کا عمل بری طرح متاثر ہو رہا ہے۔

محکمۂ صحت کا کہنا ہے کہ لیبارٹری ٹیسٹس اور بلڈ بینک سے متعلق سامان کی کمی 59 فیصد تک پہنچ چکی ہے، جس کے باعث تشخیص اور ہنگامی علاج میں شدید مشکلات درپیش ہیں۔ ہسپتالوں میں کام کرنے والے ڈاکٹروں کے مطابق کئی جان بچانے والی ادویات مکمل طور پر ختم ہو چکی ہیں اور محدود وسائل کے باعث مریضوں کی صحت یابی ممکن نہیں رہی۔

اگرچہ غزہ میں جنگ بندی ہو چکی ہے، تاہم انسانی امداد اور طبی سامان کی ترسیل ضرورت کے مطابق نہیں ہو پا رہی۔ محکمۂ صحت نے عالمی اداروں سے فوری طور پر دواؤں، لیبارٹری آلات اور بلڈ بینک کے سامان کی فراہمی کا مطالبہ کیا ہے۔

عرب میڈیا کے مطابق جنگ کے دوران اسرائیلی فوج نے غزہ میں 34 اسپتالوں سمیت 125 صحت کے مراکز کو مکمل طور پر تباہ کر دیا۔ جنگ بندی معاہدے کے تحت گزشتہ روز اسرائیلی قید سے رہا کیے گئے 6 فلسطینی قیدی دیرالبلح کے ایک ہسپتال منتقل کیے گئے، جبکہ 10 ہزار سے زائد فلسطینی اب بھی اسرائیلی جیلوں میں قید ہیں۔