بنوں میں سی ٹی ڈی پر دہشتگردوں کا حملہ ناکام، 5 دہشتگرد ہلاک، دو شہری جاں بحق

بنوں کے علاقے ڈومیل ہلال چوک میں محکمہ انسدادِ دہشت گردی (سی ٹی ڈی) کی اے پی سی پر دہشت گردوں کے حملے کو پولیس نے بروقت اور مضبوط جوابی کارروائی سے ناکام بنا دیا۔ فائرنگ کے تبادلے میں پانچ دہشت گرد ہلاک جبکہ افسوسناک طور پر دو مقامی شہری جاں بحق ہوگئے۔

سی ٹی ڈی کے مطابق دہشت گرد ابتدائی فائرنگ کے بعد قریبی گھر میں داخل ہوگئے جہاں انہوں نے مزاحمت کے دوران دو شہریوں کو بھی نشانہ بنایا۔ واقعے کے بعد بنوں ریجن پولیس، سی ٹی ڈی اور سیکیورٹی فورسز نے مشترکہ کلیئرنس آپریشن شروع کیا جو آٹھ گھنٹے تک جاری رہا۔ آپریشن کے اختتام پر تمام پانچ دہشت گرد مارے گئے جبکہ ان کے قبضے سے اسلحہ اور بارود بھی برآمد کیا گیا۔

سی ٹی ڈی نے بتایا کہ ہلاک دہشت گردوں میں ایک کی شناخت رسول عرف کمانڈر اریانہ کے نام سے ہوئی ہے جبکہ دیگر کی شناخت کا عمل جاری ہے۔ دو دہشت گرد ابتدائی مقابلے میں ہلاک ہوئے تھے جبکہ باقی گھر میں گھسنے کے بعد انجام کو پہنچے۔

علاقہ مکینوں نے دہشت گردی کے خاتمے کے لیے پولیس اور سیکیورٹی فورسز کے ساتھ مکمل یکجہتی کا اظہار کیا اور کہا کہ وہ امن قائم رکھنے کی جدوجہد میں فورسز کے شانہ بشانہ کھڑے رہیں گے۔