ملک میں قیامِ امن کا مشن، بنوں میں بڑی کارروائی، آٹھ بھارتی اسپانسرڈ خوارج ہلاک

صدرِ مملکت آصف علی زرداری نے بنوں میں بھارتی پشت پناہی میں سرگرم دہشت گردوں کے خلاف کامیاب مشترکہ آپریشن پر سیکیورٹی فورسز اور قانون نافذ کرنے والے اداروں کو خراجِ تحسین پیش کیا۔ صدر نے کہا کہ آٹھ بھارتی اسپانسرڈ خوارج کی ہلاکت جوانوں کے عزم، بہادری اور پیشہ ورانہ مہارت کا ثبوت ہے۔ انہوں نے مزید کہا کہ خوارج کے خلاف مربوط اور ٹھوس کارروائیاں قومی سلامتی کو مزید مضبوط بنا رہی ہیں۔

بھارتی سرپرستی میں سرگرم منظم دہشت گرد نیٹ ورکس کا خاتمہ ریاست کی اولین ترجیح ہے۔ “وطنِ عزیز کی بقا بیرونی پشت پناہی میں ہونے والی دہشت گردی کے مکمل خاتمے سے ہی ممکن ہے،” صدرِ مملکت کا کہنا تھا۔ وزیراعظم محمد شہباز شریف نے بھی بنوں میں دہشت گردوں کے خلاف کامیاب کارروائی پر سیکیورٹی فورسز کی تحسین کی۔ وزیراعظم نے 8 خوارج کو ہلاک کرنے پر فورسز کی جرات اور آپریشنل کامیابی کو سراہتے ہوئے کہا کہ ’’عزمِ استحکام‘‘ کے ویژن کے تحت سیکیورٹی فورسز دہشت گردی کے خلاف نمایاں فتوحات حاصل کر رہی ہیں۔ انہوں نے کہا کہ پوری قوم دہشت گردی کے خلاف جنگ میں اپنی بہادر افواج کے ساتھ کھڑی ہے، اور ملک سے ہر قسم کی دہشت گردی کے مکمل خاتمے کے لیے پرعزم ہے۔

سیکیورٹی اداروں کے مطابق علاقے میں مزید دہشت گرد عناصر کی موجودگی کے خدشے کے پیشِ نظر سینیٹائزیشن آپریشن جاری ہے، تاکہ بھارتی سرپرستی میں سرگرم خوارج کے تمام ٹھکانوں کا مکمل خاتمہ یقینی بنایا جا سکے۔