بنگلادیش کے عام انتخابات میں بی این پی کی واضح کامیابی، ریفرنڈم میں اصلاحات کی بھرپور حمایت

بنگلہ دیش کے 13ویں پارلیمانی انتخابات میں  بی این پی نے واضح برتری حاصل کرتے ہوئے میدان مار لیا ہے۔ غیر سرکاری اور غیر حتمی نتائج کے مطابق بی این پی اور اس کی اتحادی جماعتوں نے 299 میں سے 209 نشستیں جیت لی ہیں، جس سے دو تہائی اکثریت کی راہ ہموار ہو گئی ہے۔
غیر مصدقہ نتائج کے مطابق پارٹی کی قیادت کرنے والے طارق رحمان 151 نشستوں پر کامیابی حاصل کر چکے ہیں اور ڈھاکا و بوگرہ دونوں حلقوں سے کامیاب قرار پائے ہیں۔
بنگلادیشی میڈیا کے مطابق جماعت اسلامی بنگلہ دیش اور دیگر اتحادیوں نے 70 نشستیں حاصل کیں جبکہ نیشنل سٹیزن پارٹی ، جو جماعت اسلامی کے ساتھ اتحاد میں شامل تھی، 5 نشستیں جیت سکی۔

طارق رحمان نے کامیابی کے بعد اپنے بیان میں کہا کہ امن و امان کا قیام ان کی اولین ترجیح ہو گی تاکہ شہری خود کو محفوظ محسوس کریں۔ انہوں نے خواتین کی نمائندگی اور شمولیت پر زور دیتے ہوئے کہا کہ ملک کی نصف آبادی خواتین پر مشتمل ہے، اس لیے ان کے حقوق اور کردار کو مرکزی حیثیت دی جائے گی۔ انہوں نے کارکنوں سے اپیل کی کہ وہ جشن یا ریلیوں سے گریز کریں اور خصوصی دعاؤں میں شریک ہوں۔
ادھر جماعت اسلامی کے شفیق الرحمان نے بعض حلقوں میں نتائج کے اعلان میں تاخیر پر الیکشن کمیشن پر تحفظات کا اظہار کرتے ہوئے احتجاج کی دھمکی دی ہے۔ انہوں نے کہا کہ سرکاری نتائج آنے کے بعد باضابطہ ردعمل دیا جائے گا اور تعمیری سیاست کو ترجیح دی جائے گی۔
قومی ریفرنڈم کے نتائج
انتخابات کے ساتھ قومی ریفرنڈم بھی منعقد ہوا، جس میں ڈھاکا سے موصولہ نتائج کے مطابق 73 فیصد ووٹرز نے مجوزہ اصلاحات کے حق میں ووٹ دیا۔ عوام کو ہاں یا نہیں کے ذریعے آئینی و سیاسی اصلاحات پر رائے دینے کا موقع دیا گیا، جس سے ملک کے مستقبل کے سیاسی ڈھانچے کا تعین کیا جائے گا۔