بلوچستان میں گیس کمپنی کے 6 مزدور اغوا

بلوچستان کے ضلع ہرنائی کی تحصیل شاہرگ سے نامعلوم مسلح افراد نے ایک گیس کمپنی کے 6 مقامی مزدوروں کو اغوا کر لیا ہے۔

پولیس حکام کے مطابق، اغوا کا یہ افسوسناک واقعہ شاہرگ کے علاقے زرغون غر شعبان میں پیش آیا، جہاں نامعلوم مسلح ملزمان نے گیس کمپنی کی سائیٹ پر کام کرنے والے مزدوروں کو یرغمال بنایا اور انہیں اپنے ساتھ کسی نامعلوم سمت کی طرف لے گئے۔

پولیس نے مغوی مزدوروں کی شناخت جاری کر دی ہے، جن میں جلات خان، محمد ہاشم، کمال خان، جہانگیر خان، محمد عظیم اور روزے خان شامل ہیں۔ حکام کا کہنا ہے کہ زرغون غر سے اغوا ہونے والے یہ تمام مزدور پشتون ہیں اور ان کا تعلق مقامی دمڑ قبیلے سے ہے۔ واقعے کے بعد قانون نافذ کرنے والے اداروں نے علاقے کی ناکہ بندی کر کے مغویوں کی بحفاظت بازیابی اور ملزمان کی گرفتاری کے لیے سرچ آپریشن شروع کر دیا ہے۔