بلوچستان حملہ پوری قوم کے دل پر وار ہے: نواز شریف

نواز شریف نے بلوچستان میں ہونے والے دہشت گرد حملے پر گہرے دکھ اور افسوس کا اظہار کرتے ہوئے کہا ہے کہ دہشت گردی کے خلاف قوم کا عزم آج بھی مضبوط اور غیر متزلزل ہے۔

لاہور سے جاری بیان میں نواز شریف نے کہا کہ معصوم شہریوں کو نشانہ بنانا انتہائی افسوسناک اور بزدلانہ عمل ہے، اور بلوچستان کا حالیہ واقعہ پوری قوم کے دل پر حملے کے برابر ہے۔

انہوں نے کہا کہ وہ شہداء کے اہل خانہ کے غم میں برابر کے شریک ہیں اور زخمیوں کی جلد صحت یابی کے لیے دعا گو ہیں۔

مسلم لیگ ن کے صدر نے دعا کی کہ اللہ تعالیٰ شہداء کو بلند درجات عطا فرمائے اور ان کے اہل خانہ کو صبر جمیل دے۔

نواز شریف نے اس بات پر زور دیا کہ پوری قوم دہشت گردی کے خلاف متحد ہے اور ملک دشمن عناصر کے ناپاک عزائم کو کامیاب نہیں ہونے دیا جائے گا۔