بدین میں پسند کی شادی کا تنازع، 60 گھر مسمار، 600 افراد نقل مکانی پر مجبور

بدین کے علاقے گولاڑچی کے چک نمبر 5 میں پسند کی شادی کا تنازع شدید رخ اختیار کر گیا، جہاں مبینہ طور پر مسلح افراد نے ماچھی برادری کے 60 سے زائد گھروں کو مسمار کر کے پورا گاؤں خالی کرا دیا۔ متاثرین کے مطابق مسلح افراد گھروں سے لاکھوں روپے مالیت کا سامان اور مویشی لوٹ کر لے گئے، جس کے باعث 600 سے زائد افراد بے گھر ہو کر نقل مکانی پر مجبور ہو چکے ہیں۔ پولیس کا کہنا ہے کہ ندیم ماچھی اور عالیہ فاطمہ نے چند روز قبل پسند کی شادی کی تھی، جس کے بعد یہ تنازع پیدا ہوا۔ متاثرہ جوڑے نے مؤقف اختیار کیا کہ پسند کی شادی کی سزا پورے گاؤں کو دی جا رہی ہے۔ دوسری جانب متاثرین کا کہنا ہے کہ انہوں نے ایس ایس پی بدین کو 12 درخواستیں جمع کروائیں، لیکن پولیس کی جانب سے کوئی مؤثر کارروائی نہیں کی گئی۔