بدخشان میں طالبان مخالف کارروائیاں تیز، مختلف اضلاع میں جھڑپیں، سییورٹی صورتحال کشیدہ

افغانستان کے صوبہ بدخشان میں طالبان مخالف مسلح کارروائیوں میں اچانک تیزی کے بعد سیکیورٹی صورتحال شدید کشیدہ ہو گئی ہے، جس نے طالبان کے کامل کنٹرول کے دعوؤں پر سوالات اٹھا دیے ہیں۔ افغانستان فریڈم فرنٹ نے دعویٰ کیا ہے کہ اس کے جنگجوؤں نے کابل سے بدخشان جانے والے طالبان کے ایک فوجی قافلے کو راکٹ حملے کا نشانہ بنایا، جس کے نتیجے میں 7 اہلکار ہلاک اور 6 سے زائد زخمی ہو گئے۔ اس کے علاوہ گروپ نے ضلع زیباک میں طالبان کے 2 فوجی ڈرون مار گرانے اور ایک ہیلی کاپٹر کو ناکام واپس بھیجنے کا بھی دعویٰ کیا ہے۔ معروف افغان صحافی بلال سروری کے مطابق یہ حملے فریڈم فرنٹ کی بڑھتی ہوئی جنگی و انٹیلی جنس صلاحیتوں کو ظاہر کرتے ہیں، جبکہ سابق نائب صدر امراللہ صالح نے مؤقف اختیار کیا ہے کہ طالبان کے خلاف منظم ہوتی ہوئی سیاسی و عسکری مزاحمت بالآخر ان کے اقتدار کے خاتمے کا سبب بنے گی۔