ایرانی صدر نیویارک روانہ، عالمی برادری تک ایران کا پیغام پہنچانے کا عزم

ایران کے صدر مسعود پزشکیان اقوامِ متحدہ کی جنرل اسمبلی کے 81 ویں اجلاس میں شرکت کے لیے نیویارک روانہ ہو گئے ہیں۔ امریکا روانگی سے قبل تہران میں صحافیوں سے گفتگو کرتے ہوئے ایرانی صدر نے عزم ظاہر کیا کہ وہ اس عالمی فورم پر ایران کا مؤقف اور جغرافیائی صورتحال کا فریم ورک بھرپور انداز میں پیش کریں گے۔ انہوں نے کہا کہ وہ ایرانی عوام کو درپیش مشکلات اور مخالفین کے اقدامات سے دنیا کو آگاہ کریں گے، اور یہ اجلاس ایران کا پیغام عالمی برادری تک پہنچانے کا ایک اہم موقع ہے۔

دوسری جانب، نیویارک پہنچنے پر ایرانی وزیر خارجہ عباس عراقچی نے میڈیا سے گفتگو کرتے ہوئے کہا کہ ایران اب بھی حالتِ جنگ میں ہے اور جنگ کے بعد پیدا ہونے والی چیلنجنگ صورتحال مسلسل برقرار ہے۔ انہوں نے مغربی اور یورپی ممالک کے دہرے معیار پر تنقید کرتے ہوئے کہا کہ وہ فلسطین، غزہ، لبنان اور ایران کے معاملے پر خاموش تماشائی بنے ہوئے ہیں، جبکہ ایران میں کسی ایک فرد کا مسئلہ بننے پر بھی انسانی حقوق کا واویلا مچاتے ہیں۔ عباس عراقچی نے کہا کہ اقوامِ متحدہ عالمی امن و سلامتی برقرار رکھنے میں مکمل ناکام ہو چکی ہے اور اس پر اعتماد ختم ہو چکا ہے جس کی بحالی اب ناگزیر ہے۔ انہوں نے تصدیق کی کہ صدر مسعود پزشکیان جنرل اسمبلی سے خطاب کے علاوہ مختلف عالمی سربراہان سے دوطرفہ ملاقاتیں اور عالمی میڈیا کو انٹرویوز بھی دیں گے تاکہ ایرانی عوام کے حقوق اور مفادات کا دفاع کیا جا سکے۔