عطاء اللّٰہ خان عیسیٰ خیلوی کا اپنی قبر تیار کرنے کا انکشاف

پاکستان کے لیجنڈری اور معروف لوک گلوکار عطاء اللّٰہ خان عیسیٰ خیلوی نے ایک حالیہ پوڈکاسٹ میں اپنی زندگی، موت کے فلسفے اور آخرت کی تیاری سے متعلق گفتگو کرتے ہوئے بتایا ہے کہ انہوں نے اپنے آبائی شہر عیسیٰ خیل میں اپنی آخری آرام گاہ یعنی قبر پہلے سے ہی تیار کروا لی ہے۔

پوڈکاسٹ کے دوران بات کرتے ہوئے انہوں نے کہا کہ ہمارا خاندانی قبرستان ہے جہاں انہوں نے اپنے لیے ایک قبر مخصوص کروائی ہوئی ہے۔ گلوکار نے بتایا کہ فارم ہاؤس اور مسجد کی تعمیر مکمل ہونے کے بعد ان کے ذہن میں خیال آیا کہ ان کی آخری آرام گاہ بھی وہیں ہونی چاہیے۔ انہوں نے کہا کہ اگر کوئی ان کی زندگی میں آئے تو وہ اسے اپنی قبر دکھا بھی سکتے ہیں، ورنہ دنیا سے رخصتی کے بعد تو سب دیکھ ہی لیں گے۔

عطاء اللّٰہ عیسیٰ خیلوی نے مزید بتایا کہ والدہ، عزیز و اقارب اور قریبی دوستوں کی وفات کے بعد وہ زندگی اور موت کے بارے میں زیادہ گہرائی سے سوچنے لگے ہیں۔ انہوں نے دعا کرتے ہوئے کہا کہ وہ صرف اللہ تعالیٰ سے ایک پُرسکون اور باایمان موت کے طلبگار ہیں۔ گلوکار کے اس جذباتی بیان نے سوشل میڈیا پر صارفین کی بڑی تعداد کی توجہ حاصل کر لی ہے اور لوگ ان کی درازیٔ عمر کی دعائیں کر رہے ہیں۔