موسمیاتی تبدیلیاں برفانی چیتے کیلئے بھی خطرات بڑھا رہی ہیں: عطا تارڑ

وفاقی وزیرِ اطلاعات و نشریات عطاء اللہ تارڑ نے کہا ہے کہ برفانی چیتا پاکستان کے قومی فخر اور حیاتیاتی تنوع کی اہم علامت ہے، تاہم موسمیاتی تبدیلیوں اور غیر ذمہ دارانہ انسانی سرگرمیوں کے باعث اس نایاب جنگلی حیات کا وجود خطرے میں ہے۔

برفانی چیتے کے تحفظ کے عالمی دن کی تقریب سے خطاب کرتے ہوئے وفاقی وزیر نے بتایا کہ پاکستان میں برفانی چیتوں کی موجودہ تعداد 200 سے 300 کے درمیان رہ گئی ہے، جنہیں غیر قانونی شکار اور قدرتی مسکن کی تباہی جیسے شدید چیلنجز درپیش ہیں۔ انہوں نے اعلان کیا کہ وفاقی حکومت کی سربراہی میں ایک خصوصی کمیٹی قائم کی جا رہی ہے جس میں WWF، گلگت بلتستان، خیبر پختونخوا اور آزاد کشمیر کے نمائندے شامل ہوں گے۔

عطاء تارڑ نے سیاحت کو ماحول دوست بنانے کی ضرورت پر زور دیتے ہوئے کہا کہ سکردو اور گلگت جانے والی پروازوں میں سیاحوں کے لیے معلوماتی بروشرز رکھے جائیں گے تاکہ وہ شمالی علاقوں کے قدرتی ماحول، مقامی ثقافت اور جنگلی حیات کے تحفظ سے متعلق آگاہی حاصل کر سکیں۔