کامن ویلتھ گیمز: ارشد ندیم نے جیولین تھرو کے فائنل کیلئے کوالیفائی کرلیا

گلاسگو میں جاری کامن ویلتھ گیمز کے جیولین تھرو مقابلے میں پاکستان کے نامور اتھلیٹ ارشد ندیم شاندار کارکردگی کا مظاہرہ کرتے ہوئے ٹاپ 12 اتھلیٹس میں جگہ بنا کر فائنل کے لیے کوالیفائی کر گئے ہیں، جبکہ دیگر قومی اتھلیٹ محمد یاسر سلطان فائنل میں جگہ بنانے میں ناکام رہے۔ کوالیفائنگ راؤنڈ میں ارشد ندیم نے اپنی پہلی تھرو میں 78.63 میٹر کا فاصلہ طے کیا، ان کی دوسری تھرو ضائع ہوئی جبکہ تیسری کوشش میں انہوں نے 75.65 میٹر تھرو کی۔ دوسری جانب محمد یاسر کی پہلی تھرو ضائع ہوئی، جبکہ دوسری تھرو 71.42 میٹر اور تیسری تھرو 74.36 میٹر رہی۔ بھارت کے نیرج چوپڑا نے اپنی دوسری کوشش میں 79.61 میٹر تھرو کی جبکہ پہلی تھرو میں وہ ارشد ندیم سے پیچھے رہے۔ ارشد ندیم کی کامیابی پر ان کے ہوم ٹاؤن میاں چنوں میں جشن کا سماں ہے جہاں اہل علاقہ ان کی کامیابی کے لیے دعا گو ہیں۔ جیولین تھرو کا فائنل مقابلہ کل منعقد ہوگا۔