معروف یوٹیوبر رجب بٹ ایک بار پھر قانون کی زد میں آ گئے

معروف یوٹیوبر رجب بٹ کے خلاف صوبائی دارالحکومت لاہور کے تھانہ نواب ٹاؤن میں ایک اور مقدمہ درج کر لیا گیا ہے۔ یہ مقدمہ عائشہ شرافت نامی خاتون کی مدعیت میں درج کیا گیا ہے جس میں رجب بٹ کو باقاعدہ نامزد کیا گیا ہے۔

تھانہ نواب ٹاؤن میں درج ایف آئی آر کے مطابق مدعیہ عائشہ شرافت نے پولیس کو بتایا کہ وہ 25 جولائی کو اپنے دوستوں کے ہمراہ ایک مقامی نجی کیفے میں کھانا کھانے گئی تھی، جہاں دو لڑکوں اور دو لڑکیوں نے ان کی دوست کے ساتھ بدتمیزی شروع کر دی۔ خاتون نے الزام عائد کیا کہ اس دوران ملزمان نے تھپڑ مارے اور اسلحہ نکال لیا، جبکہ میر شفیع نامی ایک ملزم نے موقع پر فائرنگ بھی کی۔

مدعیہ نے اپنے بیان میں دعویٰ کیا ہے کہ یہ حملہ یوٹیوبر رجب بٹ کی ایما پر کروایا گیا ہے۔ پولیس نے واقعے کی ایف آئی آر درج کر کے معاملے کی تفصیلی تحقیقات کا آغاز کر دیا ہے۔