والد کے پیسے واپس دلوانے کیلئے انڈر ورلڈ ڈان نے مدد کی پیشکش کی تھی، شاداب امجد خان

بالی ووڈ کے لیجنڈری اداکار اور فلم ‘شعلے’ میں ‘گبر سنگھ’ کے لازوال کردار سے شہرت پانے والے مرحوم امجد خان کے بیٹے شاداب خان نے ایک انٹرویو میں ماضی کا ایک بڑا راز فاش کرتے ہوئے بتایا ہے کہ ان کے والد کے انتقال کے بعد ایک انڈر ورلڈ ڈان نے ان کی پھنسی ہوئی رقم واپس دلوانے کی پیشکش کی تھی۔ شاداب خان کے مطابق، فلم انڈسٹری کے کئی نامور فلم سازوں اور پروڈیوسرز نے ان کے والد کے ایک کروڑ 27 لاکھ روپے دبا رکھے تھے اور وہ رقم واپس کرنے کو تیار نہیں تھے۔ اس دور میں یہ رقم اتنی خطیر تھی کہ ممبئی کے انتہائی پوش علاقے پالی ہل میں تین سے چار پرتعیش فلیٹس خریدے جا سکتے تھے۔ انہوں نے بتایا کہ ان کے والد نے غریب اور ضرورت مند پروڈیوسرز کے قرضے خود معاف کر دیے تھے، لیکن جو لوگ امیر تھے اور ادائیگی کی استطاعت رکھتے تھے، انہوں نے بھی امجد خان کی موت کے بعد پیسوں کا تقاضا کرنے پر آنکھیں پھیر لیں۔

شاداب خان نے سنسنی خیز انکشاف کیا کہ والد کی وفات کے چند ماہ بعد مشرقِ وسطیٰ (Middle East) سے ایک بڑے انڈر ورلڈ ڈان کا فون آیا، جو اتفاق سے انہوں نے خود ہی اٹھایا تھا۔ ڈان نے پیشکش کی کہ “ہمیں معلوم ہے کہ امجد صاحب کے فلم انڈسٹری پر کتنے واجبات ہیں، آپ ہمیں اجازت دیں، ہم صرف تین دن کے اندر یہ تمام رقم وصول کر کے آپ کے گھر کی دہلیز پر پہنچا دیں گے۔” تاہم، جب یہ بات ان کی والدہ شہلا خان کے علم میں آئی تو انہوں نے غیرتِ نفس اور اصول پسندی کی اعلیٰ مثال قائم کرتے ہوئے اس پیشکش کو فوراً مسترد کر دیا۔ ان کی والدہ کا کہنا تھا کہ امجد خان نے اپنی زندگی میں کبھی بھی انڈر ورلڈ یا جرائم پیشہ عناصر سے کوئی تعلق نہیں رکھا اور نہ ہی ان سے کوئی فائدہ اٹھایا، اس لیے وہ ان کے جانے کے بعد یہ غلط روایت قائم نہیں کریں گی اور اللہ ان کا حامی و ناصر ہوگا۔ واضح رہے کہ امجد خان نے اپنے 20 سالہ فلمی کیریئر میں 130 سے زائد فلموں میں لازوال کردار ادا کیے، اور وہ محض 51 سال کی عمر میں دل کا دورہ پڑنے کے باعث انتقال کر گئے تھے۔