آبنائے ہرمز ’آبنائے امن ‘ یا ’آبنائے تکلیف‘ کچھ بھی بن سکتی ہے، لاریجانی

ایران کی سپریم نیشنل سکیورٹی کونسل کے سیکرٹری علی لاریجانی نے امریکا اور اسرائیل کو وارننگ دیتے ہوئے کہا ہے کہ آبنائے ہرمز ’آبنائے امن‘ یا ’آبنائے تکلیف‘ کچھ بھی بن سکتی ہے۔

لاریجانی نے چھ مختلف زبانوں میں جاری اپنے پیغام میں کہا کہ آبنائے ہرمز یا تو سب کے لیے امن اور خوشحالی کی آبنائے ہو گی یا پھر جنگی جنون میں مبتلا لوگوں کے لیے شکست و تکلیف کی آبنائے ہو گی۔

یہ بیان ایک ایسے وقت سامنے آیا ہے جب تیل کی قیمتوں میں اس خدشے کی وجہ سے اضافہ ہو رہا ہے کہ ایران کے ساتھ جنگ ​​کی وجہ سے آبنائے ہرمز کے ذریعے مشرق وسطیٰ سے تیل سپلائی میں خلل پڑ سکتا ہے۔ یہاں سے دنیا کی تیل کی سپلائی کا تقریباً پانچواں حصہ اس گزرگاہ سے گزرتا ہے۔

اس سے قبل ایک اور پیغام میں لاریجانی نے کہا تھا کہ ایران ٹرمپ کی ’فضول دھمکیوں‘ سے خوفزدہ نہیں۔

سوشل میڈیاپر جاری ایک پوسٹ میں انہوں  نے ٹرمپ سے کہا کہ آپ سے بھی بڑے بڑے لوگ ایرانی قوم کو ختم نہیں کر سکے۔ہوشیار رہیں کہ کہیں آپ ہی ختم نہ ہو جائیں۔