حکومت بانی پی ٹی آئی کی صحت پر کوئی سمجھوتہ نہیں کرے گی: احسن اقبال

وفاقی وزیر منصوبہ بندی و ترقی احسن اقبال نے کہا ہے کہ حکومت بانی پاکستان تحریکِ انصاف (پی ٹی آئی) کی صحت کے معاملے پر کوئی سمجھوتہ نہیں کرے گی اور انہیں جیل میں بہترین طبی سہولیات فراہم کی جا رہی ہیں۔

دنیا نیوز کے پروگرام “دنیا مہر بخاری کے ساتھ” میں گفتگو کرتے ہوئے وفاقی وزیر احسن اقبال نے واضح کیا کہ بانی پی ٹی آئی کو جیل میں علاج معالجے اور معائنے کے لیے ماہر ڈاکٹرز کی سہولت میسر ہے، اس لیے ان کی صحت کے حوالے سے تشویش یا شکوک و شبہات کی کوئی گنجائش نہیں۔ ان کا کہنا تھا کہ بانی پی ٹی آئی کی دیکھ بھال میں کوئی غفلت نہیں برتی جا رہی، وہ اپنے مخصوص سیل میں موجود ہیں جہاں تمام ضروری انتظامات موجود ہیں۔ وفاقی وزیر نے زور دیا کہ بانی پی ٹی آئی کوئی سیاسی قیدی نہیں بلکہ قانونی کارروائی کے نتیجے میں سزایافتہ قیدی ہیں۔

ملکی سیاسی صورتحال اور اپوزیشن کی تحریکِ احتجاج کا جواب دیتے ہوئے احسن اقبال نے کہا کہ اس وقت پاکستان کو احتجاج، دھرنوں اور گھیراؤ جلاؤ کی سیاست کے بجائے معاشی استحکام کی اشد ضرورت ہے۔ انہوں نے خبردار کیا کہ سڑکوں کو گرم کرنے اور گھیراؤ جلاؤ کا راستہ اختیار کرنے والی سیاست براہِ راست ملک دشمن عناصر کے تخریبی ایجنڈے کو تقویت پہنچاتی ہے۔

انہوں نے کہا کہ ملک کو کسی ایک جگہ “ڈی چوک” بنانے کے بجائے اقتصادی ترقی کی راہ پر گامزن کرنے اور ایک “اقتصادی لانگ مارچ” کی ضرورت ہے۔ حکومت کی پائیداری کے حوالے سے بات کرتے ہوئے انہوں نے واضح کیا کہ پاکستان پیپلز پارٹی (PPP) وفاقی حکومت کی مضبوط اتحادی ہے اور وہ حکومت کے ساتھ کھڑی ہے اور رہے گی۔