اداکار شان بیگ اور ماڈل و اداکارہ روما مائیکل رشتہ ازدواج میں منسلک ہوگئے۔

پاکستانی ڈراما و فلم انڈسٹری کے معروف اداکار شان بیگ اور نامور ماڈل و اداکارہ روما مائیکل رشتہ ازدواج میں منسلک ہو گئے ہیں۔ دونوں فنکاروں نے اپنی نئی زندگی کی شروعات کی خبر سوشل میڈیا کے ذریعے شیئر کی۔

فوٹو اور ویڈیو شیئرنگ ایپ انسٹاگرام پر اداکار شان بیگ نے روما مائیکل کے ساتھ اپنی ایک تصویر پوسٹ کی، جس کے کیپشن میں انہوں نے “بیوی” لکھ کر سرخ دل کے ایموجی کا اضافہ کیا۔ روما مائیکل نے بھی اس خوشخبری کو اپنے آفیشل اکاؤنٹ سے ری پوسٹ کیا۔ اس اعلان کے بعد شوبز انڈسٹری کے ساتھی فنکاروں، دوستوں اور مداحوں کی جانب سے نوبیاہتا جوڑے کو مبارکباد دینے اور ان کے لیے نیک تمناؤں کے اظہار کا سلسلہ جاری ہے۔

شادی کی خبر کے ساتھ اداکار شان بیگ نے ایک اور پیغام میں اپنی ذاتی زندگی سے متعلق وضاحت بھی جاری کی۔ انہوں نے بتایا کہ ان کی پہلی اہلیہ سے طلاق کچھ عرصہ قبل باقاعدہ حتمی شکل اختیار کر چکی تھی اور دونوں اپنی اپنی زندگیوں میں آگے بڑھ چکے ہیں۔ انہوں نے میڈیا اور مداحوں سے درخواست کی کہ ان کی پرائیویسی کا احترام کیا جائے اور ان تمام لوگوں کا شکریہ ادا کیا جو اس سفر میں ان کے ساتھ کھڑے رہے۔

واضح رہے کہ شان بیگ نے پاکستان کے ساتھ ساتھ ہالی ووڈ کے پروجیکٹس میں بھی اداکاری کے جوہر دکھائے ہیں اور وہ 2023 اور 2024 میں ‘فلم فیئر مڈل ایسٹ’ کی جانب سے فیشن انفلوئنسر آف دی ایئر کے ایوارڈ سے نوازے جا چکے ہیں۔ دوسری جانب روما مائیکل پاکستان کی ایک معروف ماڈل ہیں جنہوں نے عالمی سطح پر ‘مس چارم’ اور ‘مس گرینڈ’ جیسے بین الاقوامی مقابلوں میں پاکستان کی نمائندگی کی، جبکہ وہ پاکستانی فلم ‘کہے دل جدھر’ میں بھی اہم کردار ادا کر چکی ہیں۔