صدر مملکت اور ابوظبی پورٹس گروپ کے درمیان ملاقات، بحری تجارت کے فروغ پر اتفاق

صدرِ مملکت آصف علی زرداری سے ابوظبی پورٹس گروپ کے حکام نے ملاقات کی، جس میں پاکستان میں جاری اور آئندہ سرمایہ کاری، کراچی پورٹ کی توسیع اور بندرگاہوں کو جدید خطوط پر استوار کرنے کے امور زیرِ بحث آئے۔

گفتگو کے دوران دونوں برادر ممالک نے بندرگاہوں کی استعداد بڑھانے اور جدید انفراسٹرکچر کی ترقی کے لیے قریبی تعاون پر زور دیا، جبکہ بحری تجارت کے فروغ کے لیے شراکت داری کو مزید وسعت دینے پر اتفاق کیا گیا۔

صدر آصف علی زرداری نے ابوظبی پورٹس گروپ کی پاکستان میں سرمایہ کاری کو خوش آئند قرار دیا اور اسلام آباد میں ابوظبی پورٹس کے دفتر کے قیام کا خیرمقدم کیا۔

دونوں فریقین نے اس عزم کا اظہار کیا کہ بندرگاہی شعبے میں مشترکہ اقدامات سے پاکستان اور متحدہ عرب امارات کے تجارتی تعلقات مزید مستحکم ہوں گے۔